وعى ( الفصام )

 وعى 

It is okay not to be okay 

سمعتوا قبل كده عن الschizophrenia أو "الفصام "

تعالوا ناخد جولة كده عنه

الفصام أو زي ما بنسمع دائما في الافلام الschizophrenia ده مرض نفسي الشخص المصاب بيه بتكون عنده مشكلة في ترجمة وفهم الحقيقة والواقع لدرجة بتعيقه من أداء مهامه اليومية وحياته بشكل طبيعي .

وبتظهر الأعراض بشكل عام عند الشباب في بداية العشرينات ومن النادر جدا أنه يصيب الأطفال أو الناس فوق ال45 وبتختلف شوية من شخص للآخر احيانا ممكن تيجي شديدة وبعدين تخف وفيه ناس بتجيلها شديدة وللاسف بتستمر،

 واعراضها ممكن نستغرب منها شوية اولها وهى الاوهام فالمريض هنا ممكن يكون عنده وهم المؤامرة وأنه بيشوف أن بتتآمر وتتجسس عليه وفيه مرضى بيكون عندهم وهم أن حد بيتحكم في أفكارهم وبيحط افكار ويشيل افكار تانية من دماغهم وفيه ناس بيكون عندها وهم أنهم أشخاص عظماء زي الانبياء والملوك ولكن اللي بيعرفنا أن الشخص ده مريض فعلا وهو أن الاوهام دي بتكون غير قابلة للنقاش والتغيير عنده ومن الأعراض برضو  الهلوسة زي مثلا أنه ممكن يسمع اصوات مش موجوده في الحقيقة بتتكلم معاه وبتعلق على سلوكه وهو بيعمل اي وممكن تأمره كمان يعمل اللي هى عاوزاه وتالت عرض معانا وهو أن تفكيره بيكون غير منظم فبتلاقي الشخص في بعض الأوقات غير قادر أنه يعمل محادثة طبيعية بشكل طبيعي ده غير أفعاله اللي بتكون غريبة ومريبة زي أنه بيتصرف زي الاطفال أو بيعمل سلوكيات غير لائقة وآخر عرض وده بيكون في المراحل المتأخرة وهو أن الشخص بينسحب من الحياة وبيبقى هادي ومنزوي ومنعزل،

 وزي ما قولنا أن الأعراض دي ممكن تيجي بقوة وبعدين تخف ولكن ولكن مينفعش نوقف العلاج لانه بيكون علاجي في وقت النوبات ووقائي بشكل عام وممكن يستمر لفترة غير محدودة زمان كانوا بيقولوا أن علاجها بيتاخد مدى الحياة بس مع تطور العلم ممكن تيجي أدوية تؤدي إلى الشفاء التام وساعتها الشخص ممكن يتوقف عن العلاج،

وبرضو مننساش أن دور الأهل و القريبين من الشخص في أنهم يساعدوه ويهدوه مهم جدا جدا وبرضو مننساش أن العلاج المبكر بيؤدي لنسب استقرار عالية وممكن جزء كبير يرجع لحياته الطبيعية عادي مع أخذ الأدوية بشكل طبيعي وكل ما بنتأخر في العلاج كل ما كان الوضع مزمن وصعب. 

الادوية والرياضة والاسترخاء والحاجات اللي بتخفف القلق والتوتر بتساعد الشخص أنه ميرجعش ينتكس أو يحصله مضاعفات تانية.